Surround er eit treårig forskingsprosjekt om vilkår for berekraftig tettstadutvikling. Vi kartlegg endra arealbruk over 30 år og analyserer drivarar bak endringane. Prosjektet er finansiert av Forskingsrådet (MILJØFORSK) og blir leidd av Vestlandsforsking.
Det er tid for å oppsummere funna i Surround-prosjektet! 26.-27. september inviterer prosjektleiar Kyrre Groven alle deltakarar og andre interesserte til konferanse i Sogndal.
I den tredje vitskaplege artikkelen frå Surround-prosjektet tek Petter Næss og Karen Richardsen Moberg for seg drivkreftene som har prega tettstadutviklinga i Sogndal, Horten, Malvik og Trondheim aust dei siste tretti åra.
“Kva skal vi med tre i sentrum”, spør Inger Auestad ved Høgskulen på Vestlandet retorisk. I eit innlegg publisert i Sogn Avis i samband med Forskingsdagane 2021 og på bloggen Vill vest, tek Auestad opp kor viktig det er å ta vare på trea i tettbygde område og bysentrum.
Vestlandsforsking i Sogndal har prosjektleiinga for Surround, og er i tillegg ansvarleg for studiar av kommunal arealpolitikk.
Kyrre Groven
Kyrre Groven er seniorforskar ved Vestlandsforsking, der han forskar på områda lokal klimapolitikk, klimatilpassing, tettstadutvikling og samfunnssikkerheit. Kyrre er miljøhistorikar og har PhD i samfunnsgeografi (NTNU) på temaet klimagovernance i norske kommunar.
Carlo Aall
Carlo Aall er seniorforskar ved Vestlandsforsking, der han var forskingsleiar i 2008-2017. Sidan 2016 har han vore professor II i berekraftig utvikling ved HVL. Han er leiar for det nyoppretta Norsk senter for berekraftig klimatilpassing (Noradapt).
Karen Richardsen Moberg
Karen Richardsen Moberg ved Vestlandsforsking forskar på området klima og miljø. Ho er stipendiat ved NMBU knytt til arbeidspakke 3 i Surround, der ho forskar på korleis påviste arealbruksendringar kan forklarast.
Idun A.
Husabø
Idun A. Husabø ved Vestlandsforsking er forskar og forskingsformidlar innan berekraftig klimatilpassing. Ho har ansvar for populærvitskapleg formidling frå Surround.
NMBU er representert i Surround gjennom to fagmiljø: Institutt for by- og regionplanlegging og Institutt for landskapsarkitektur.
Petter Næss
Petter Næss er professor i planlegging i urbane regionar ved Institutt for by- og regionplanlegging på NMBU, og leiar av forskingsgruppe for urban berekraft. Petter har forska mykje på samanhengar mellom bystrukturar og transportatferd, og har dei seinare åra også studert muligheiter og avgrensingar ved økologisk modernisering som strategi for å oppnå berekraftig byutvikling.
Kine Halvorsen Thoren
Kine Halvorsen Thoren er professor ved Institutt for landskapsarkitektur på NMBU, og forskar på fysisk planlegging og arkitektur. Kine var med å introdusere grønstruktur-begrepet i norsk planlegging, og har studert samanhengar mellom fortetting og omfanget av grønstrukturar i byar.
Annegreth Dietze- Schirdewahn
Annegreth Dietze-Schirdewahn er professor ved Institutt for landskapsarkitektur ved NMBU. Viktigaste arbeidsområde for Annegreth er historia til hagar og parkar, og historia til landskapsarkitekturen i Norge.
Institutt for miljø- og naturvitskap ved Høgskulen på Vestlandet, Sogndal, er ansvarleg for studiar av endringar i grønstruktur.
Liv Norunn Hamre
Liv Norunn Hamre er førsteamanuensis ved Institutt for miljø- og naturvitskap, HVL. Ho underviser på bachelorprogrammet i Landskapsplanlegging med landskapsarkitektur. Ho forskar på landskapsendringar og menneskeleg påverknad på vegetasjon, primært i det tradisjonelle kulturlandskapet.
Marte Lange Vik
Marte Lange Vik er førsteamanuensis ved Institutt for miljø- og naturvitskap, HVL. Ho underviser på bachelorprogrammet for Landskapsplanlegging med landskapsarkitektur, og på masterprogrammet Climate Change Management. Viktigaste faglege interessefelt er medverknad og demokrati i planlegging og forvaltning av landskap.
Inger Auestad
Inger Auestad er førsteamanuensis ved Institutt for miljø- og naturvitskap, HVL. Inger underviser på bachelorprogrammet Landskapsplanlegging med landskapsarkitektur. Ho forskar på samspel mellom menneske og natur i urbane økosystem, og på restaurering av kulturmark og fjellvegetasjon.
Leif Hauge
Leif Hauge er førsteamanuensis ved Institutt for miljø- og naturvitskap. Han underviser i kulturlandskaps- og kulturminnefag på bachelorprogrammet i Landskapsplanlegging med landskapsarkitektur, og driv med visuell dokumentasjon (foto) av det tradisjonelle kulturlandskapet.
Heidi-Kathrin Osland
Heidi-Kathrin Osland er sivilarkitekt og dagleg leiar for Arkitektkontoret 4B i Sogndal. Ho har spesialkompetanse på kulturminnefeltet, med oppdrag for Riksantikvaren og Fortidsminneforeningen. Ho har dessutan lang erfaring frå planfeltet i Sogndal.
University of Tartu i Estland bidreg til Surround med ekspertise innanfor landskapsøkologi.
Aveliina Helm
Aveliina Helm er seniorforskar ved Botanisk institutt (Macroecology group) på University of Tartu i Estland. Ho forskar på landskapsendringar og effektar på biologisk mangfald, med fokus på tradisjonelt kulturlandskap. Aveliina er ein av bidragsytarane til Naturpanelet (IPBES) sin første rapport om naturtilstanden i verda.
Tsipe Aavik
Tsipe Aavik er seniorforskar ved Botanisk institutt (Macroecology group) på University of Tartu i Estland. Tsipe forskar på effektar av habitatfragmentering på artsmangfald i jordbrukslandskapet, både på arts- og gennivå.
Raine Mäntysalo
Raine Mäntysalo er professor i strategisk byplanlegging ved Department of Built Environment, Aalto University i Finland. Han er også tilknytt Oulu University, der han underviser i planteori og kommunikativ planlegging. Raine publiserer artiklar om strategi, omgrepet ‘trading zones’, demokrati og makt i arealplanlegginga.
Vestlandsforsking
Postboks 163
6851 Sogndal
