Avisinnlegg om tre i tettstader
Eit gamalt pæretre av sorten bergamott i blomst i Sogndal sin sentrumspark. I bakgrunnen ser ein Gravensteinsgata, oppkalla etter ein eplesort. Frukttrea er dessverre på vikande front, som Surround har dokumentert. Foto: Kyrre Groven
“Kva skal me med tre i sentrum?”, spør Inger Auestad ved Høgskulen på Vestlandet retorisk i eit innlegg publisert i Sogn Avis i samband med Forskingsdagane 2021.
Innlegget vart publisert i ei eiga forskingsspalte i Sogn Avis 25. september og på Forskning.no-bloggen Vill vest, der Auestad er ein fast bidragsytar.
Auestad tek opp kor viktig det er å ta vare på trea i tettbygde område og bysentrum, ikkje minst fordi trea betyr så mykje for det biologiske mangfaldet i tettstadene våre. Det yrande livet i trekronene vart nyleg dokumentert av studentar ved HVL.
Trea spelar òg ei viktig rolle når det gjeld å skape skugge på varme dagar og ta unna vatn når det regnar mykje.
Ikkje minst skapar dei trivsel.
Faksimile frå Sogn Avis laurdag 25. september 2021.